KADAMBAM SAADAM (RICE) ಕದಂಬಂ ಅನ್ನ

Categories: Kannada, Oota, upaharaPublished On: November 30, 20170 Comments0.4 min read
Indu Jayaram
SHARE
ಕದಂಬಂ ಅನ್ನ ತಮಿಳುನಾಡಿನ ಸಾಂಪ್ರಾದಾಯಿಕ ಅಡುಗೆ‌. ನವರಾತ್ರಿಯಲ್ಲಿ ತಾಯಿ ದುರ್ಗೆಯ ನೈವೇದ್ಯಕ್ಕೆ ಮಾಡುತ್ತಾರೆ. ಗಣೇಶನ ಹಬ್ಬದಲ್ಲಿ 5 ದಿನದ ನಂತರ ಗಣಪತಿಯನ್ನು ಬಿಡುವಾಗ, ಕೆಲವು ಐಯಂಗಾರ್ ಮನೆಗಳಲ್ಲಿ ಆನೆ ಹಬ್ಬದ ಸಮಯದಲ್ಲಿ ಸಹ ಮಾಡುತ್ತಾರೆ. ಮಾಡುವ ವಿಧಾನ ಮತ್ತು ರುಚಿ ಸ್ವಲ್ಪ ನಮ್ಮ ಕರ್ನಾಟಕದ ಬಿಸಿ ಬೇಳೆ ಬಾತಿನ ಹಾಗೇ ಇರುತ್ತೆ. ಬಿಸಿ ಬೇಳೆ ಬಾತಿನ ಸೋದರ ಸಂಬಂಧಿ ಎಂದೇ ಹೇಳಬಹುದು, ತರಕಾರಿ ಹೆಚ್ಚು ಹಾಕಿದಷ್ಟೂ ರುಚಿ ಹೆಚ್ಚು.

ಕದಂಬಂ ಅನ್ನ ಮಾಡುವ ವಿಧಾನ:-

   

1 ಲೋಟ ತೊಗರಿ ಬೇಳೆಯನ್ನು ತೊಳೆದು 3 ವಿಷಲ್ ಕೂಗಿಸಿ ಬೇಯಿಸಿಡಿ. 1 ಲೋಟ ಅಕ್ಕಿ ತೊಳೆದು ಸಾಧಾರಣವಾಗಿ ಮಾಡುವ ಹಾಗೆ ಅನ್ನ ಮಾಡಿಡಿ‌. ತರಕಾರಿಗಳನ್ನು ತೊಳೆದು, ದೊಡ್ಡದಾಗಿ ಹೆಚ್ಚಿಡಿ‌. ಈರುಳ್ಳಿ, ಬೆಳ್ಳುಳ್ಳಿ ಬಿಟ್ಟು ಯಾವ ತರಕಾರಿಯಾದರೂ ಹಾಕಬಹುದು‌ ಬೂದುಗುಂಬಳ, ಸಿಹಿಗುಂಬಳ, (ನೆನೆಸಿದ ಕಾಳು, ಕಡಲೇ ಬೀಜ ಬೇಕಾದಲ್ಲಿ ಬೇಳೆ ಜೊತೆ ಬೇಯಿಸಿ) ಹಾಕಿದಷ್ಟೂ ಚೆಂದ. 4 ಚಮಚ ಕಡಲೇ ಬೇಳೆ, 3 ಚಮಚ ಧನಿಯ, 3 ಚಮಚ ಗಸಗಸೆ, 1 ಇಂಚು ಚಕ್ಕೆ, 6 ಲವಂಗ, 2 ಏಲಕ್ಕಿ, ಖಾರಕ್ಕೆ 10 ಬ್ಯಾಡಗಿ, 8 ಕೆಂಪು ಒಣ ಮೆಣಸಿನ ಕಾಯಿ( ನಾನು ಪುಡಿ ಮಾಡಿ ಇಟ್ಟಿದ್ದೇನೆ) 4 ಚಮಚ ಒಣ ಕೊಬ್ಬರಿ ತುರಿ ಬೇರೆ ಹುರಿದು ಪುಡಿ ಮಾಡಿಡಿ‌. ನಿಂಬೆ ಗಾತ್ರದ ಹುಣಿಸೆ ಹಣ್ಣಿನ ರಸ ತೆಗೆದು ಇಡಿ.

   

ಕುಕ್ಕರಿನಲ್ಲಿ 6 ಚಮಚ ಎಣ್ಣೆ ಹಾಕಿ ಗಟ್ಟಿ ತರಕಾರಿ ಮೆಾದಲು ಹಾಕಿ ನಂತರ ಬೇಗ ಬೇಯುವ ತರಕಾರಿ ಹಾಕಿ 5 ನಿಮಿಷ ಬೇಯಿಸಿ, ನಂತರ ಹುಣಿಸೆ ರಸ ಹಾಕಿ, ಸ್ವಲ್ಪ ನೀರು ಸೇರಿಸಿ ತರಕಾರಿಗಳನ್ನು ಬೇಯಿಸಿ. ನಂತರ ಪುಡಿ ಮಾಡಿದ ಮಸಾಲೆ, ಉಪ್ಪು, ಚೂರು ಬೆಲ್ಲ, ಸ್ವಲ್ಪ ನೀರು ಸೇರಿಸಿ ಕುದಿಸಿ, ಬೇಯಿಸಿದ ಅನ್ನ, ಬೇಳೆ, 4 ಚಮಚ ತುಪ್ಪ ಹಾಕಿ ಕಲೆಸಿ, 5 ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ. ಕೊನೆಯಲ್ಲಿ ಸಾಸಿವೆ, ಇಂಗು, ಕರಿಬೇವಿನ ಒಗ್ಗರಣೆ (ಗೋಡಂಬಿ optional) ಹಾಕಿ, ಸ್ವಲ್ಪ ಒಣ ಕೊಬ್ಬರಿ ತುರಿ ಹಾಕಿ ಬಿಸಿಯಾಗಿ ಬಡಿಸಿ.

   

ಇದೇ ಮಸಾಲೆ ಪುಡಿ ಬಳಸಿ ಬಿಸಿ ಬೇಳೆ ಬಾತ್ ಸಹ ಮಾಡಬಹುದು. 1 ಲೋಟ ಬೇಳೆ ಬೇಯಿಸಿಡಿ. 1 ಲೋಟ ಅಕ್ಕಿ ನೆನೆಸಿಡಿ, ಕುಕ್ಕರಿನಲ್ಲಿ 4 ಚಮಚ ಎಣ್ಣೆ ಹಾಕಿ ತರಕಾರಿ ಹಾಕಿ ಬಾಡಿಸಿ, ಮಸಾಲೆ ಪುಡಿ, ಅಕ್ಕಿ ಹಾಕಿ ಹುರಿದು, ನಂತರ ನೀರು ಹುಣಿಸೆ ರಸ, ಚೂರು ಬೆಲ್ಲ, ಉಪ್ಪು, ಬೆಂದ ಬೇಳೆ, 4 ಚಮಚ ತುಪ್ಪ ಹಾಕಿ, ಅಕ್ಕಿ ತರಕಾರಿ ಬೆಂದ ಮೇಲೆ, ಒಗ್ಗರಣೆಗೆ ಸಾಸಿವೆ ಇಂಗು ಕರಿಬೇವು ಹಾಕಿದರೆ ಬಿಸಿ ಬೇಳೆ ಬಾತ್ ಸಿದ್ಧ. ಹೀಗೆ ಮಾಡಿದರೆ ಬಿಸಿ ಬೇಳೆ ಬಾತ್ , ಹಾಗೆ ಮಾಡಿದರೆ ಕದಂಬಂ, ನಿಮ್ಮ ಸಮಯ, ರುಚಿಗೆ ತಕ್ಕಂಕೆ ಮಾಡಿಕೊಳ್ಳಬಹುದು‌.

ಧನ್ಯವಾದಗಳು.

About the Author: Indu Jayaram

Indu Jayaram is a homemaker and regularly writes on home cooked food. She has more than 10,000 followers in her facebook page https://www.facebook.com/pg/indumathijayaram/

Leave A Comment