ನಾವು ಸಾಧಾರಣವಾಗಿ ಉಡುಪಿ ಶೈಲಿಯ ಹೋಟೆಲ್ ಗಳಿಗೆ ಹೋದಾಗ, ಮಾಣಿ ಹೇಳುವ ತಿಂಡಿಗಳ, ಉದ್ದನೆ ಪಟ್ಟಿಯಲ್ಲಿ ರವಾ ಪೊಂಗಲ್ ಸಹ ಒಂದು, ರುಚಿಕರ, ಆರೋಗ್ಯಕರ, ಮಾಡುವುದು ಬಹಳ ಸುಲಭ, ಎಷ್ಟು ಹೆಸರು ಬೇಳೆ ತಿಂದರೂ ಒಳ್ಳೆಯದು, ಹಾಗಾದರೆ ನೀವು ಒಮ್ಮೆ ಮಾಡಿ ನೋಡಿ.

ರವಾ ಪೊಂಗಲ್ ಮಾಡುವ ವಿಧಾನ:-

   

1 ಲೋಟ medium ರವೆಯನ್ನು ಹುರಿದಿಟ್ಟುಕೊಳ್ಳಿ, 1 ಲೋಟ ಹೆಸರು ಬೇಳೆಯನ್ನು ಸ್ವಲ್ಪ ಹುರಿದು 2 ಲೋಟ ನೀರು ಹಾಕಿ 2 ವಿಷಲ್ ಕೂಗಿಸಿ ಇಟ್ಟು ಕೊಳ್ಳಿ, 1 ಚಮಚ ಕರಿ ಮೆಣಸು, 1 ಚಮಚ ಜೀರಿಗೆ ಹುರಿದು ತರಿ ತರಿಯಾಗಿ ಪುಡಿ ಮಾಡಿ ಇಡಿ. ಬಾಣಲೆಯಲ್ಲಿ 4 ಚಮಚ ತುಪ್ಪ ಹಾಕಿ, ಮೆಣಸು ಜೀರಿಗೆ ಪುಡಿ, ಹಿಂಗು, ಕರಿಬೇವು, 1/2 ಇಂಚು ತುರಿದ ಶುಂಠಿ, 4 ಉದ್ದಕ್ಕೆ ಸೀಳಿದ ಹಸಿ ಮೆಣಸಿನ ಕಾಯಿ ಹಾಕಿ ಸ್ವಲ್ಪ ಬಾಡಿಸಿ, ನಂತರ ಬೇಯಿಸಿದ ಹೆಸರು ಬೇಳೆ, 3 ಲೋಟ ನೀರು, ರುಚಿಗೆ ಉಪ್ಪು ಹಾಕಿ, ಕುದಿಸಿ, ಸ್ವಲ್ಪ ಸ್ವಲ್ಪ ಹುರಿದ ರವೆ ಹಾಕಿ, ಚೆನ್ನಾಗಿ ಕಲೆಸಿ, ತಟ್ಟೆ ಮುಚ್ಚಿ, ಸಣ್ಣ ಉರಿಯಲ್ಲಿ 10 ನಿಮಿಷ ಬೇಯಿಸಿ, ಕೊನೆಯಲ್ಲಿ ಕಾಯಿ ತುರಿ, ಕೊತ್ತಂಬರಿ ಸೊಪ್ಪು, (ನಿಂಬೆ ರಸ optional), 2 ಚಮಚ ತುಪ್ಪ ಹಾಕಿ ಕಲೆಸಿ, ಬಿಸಿಯಾಗಿ ಮೊಸರು ಬಜ್ಜಿ/ಚಟ್ನಿ/ಹುಣಿಸೆ ಗೊಜ್ಜಿನೊಂದಿಗೆ ಬಡಿಸಿ. ಪೊಂಗಲ್ ಎಂದ ಮೇಲೆ ತುಪ್ಪ ತುಸು ಹೆಚ್ಚೇ ಇರಬೇಕು.

ಹುಣಿಸೆ ಗೊಜ್ಜು ಮಾಡುವ ವಿಧಾನ:-

ನಿಂಬೆ ಗಾತ್ರದ ಹುಣಿಸೆ ಹಣ್ಣಿದ ರಸ ತೆಗೆದಿಡಿ, ಒಗ್ಗರಣೆಗೆ ಸಾಸಿವೆ, ಕರಿಬೇವು ಹಿಂಗು, ರಸಂ ಪುಡಿ 2 ಚಮಚ, ಉಪ್ಪು, ಚೂರು ಬೆಲ್ಲ, ಹುಣಿಸೆ ರಸ ಹಾಕಿ ಕುದಿಸಿ ದರೆ ಹುಣಿಸೆ ಗೊಜ್ಜು ರೆಡಿ, ಈ ಗೊಜ್ಜು ಖಾರಾ ಪೊಂಗಲ್ ಜೊತೆ ಸಹ ಚೆನ್ನಾಗಿರುತ್ತದೆ‌.

ಖಾರಾ ಪೊಂಗಲ್

ರವಾ ಪೊಂಗಲ್ ರೆಸಿಪಿ ಸ್ವಲ್ಪ ಬದಲಾವಣೆ ಮಾಡಿದರೆ ಖಾರಾ ಪೊಂಗಲ್ ಮಾಡಬಹುದು. 1 ಲೋಟ ಅಕ್ಕಿ, 1/2 ಲೋಟ ಹೆಸರು ಬೇಳೆ ಸ್ವಲ್ಪ ಹುರಿದು, 4 ಲೋಟ ನೀರು ಹಾಕಿ 2 ವಿಷಲ್ ಕೂಗಿಸಿ ಇಟ್ಟು ಕೊಳ್ಳಿ, ಒಗ್ಗರಣೆ ಇದೇ ರೆಸಿಪಿಯಂತೆ ಮಾಡಿ, ಬೆಂದ ಅಕ್ಕಿ ಬೇಳೆ ಮಿಶ್ರಣ ಹಾಕಿ 5 ನಿಮಿಷ ಕಡಿಮೆ ಉರಿಯಲ್ಲಿ ಕುದಿಸಿದರೆ ಖಾರಾ ಪೊಂಗಲ್ ರೆಡಿ.

ನೀವು ಖಾರಾ ಪೊಂಗಲ್ ಮತ್ತಷ್ಟು ರುಚಿಯಾಗಿ ಮಾಡಬೇಕೆಂದರೆ ಬೇಯಿಸುವಾಗ ಅಥವಾ ಒಗ್ಗರಣೆ ಹಾಕಿ ಪೊಂಗಲ್ ಹದಕ್ಕೆ ಮಿಶ್ರ ಮಾಡುವಾಗ ಹಾಲು ಹಾಕಿದರೆ , ಖಾರಾ ಮಿಲ್ಕ್ ಪೊಂಗಲ್ ಸಿದ್ಧ!!! ಮಾಡಿ ನೋಡಿ,

ಧನ್ಯವಾದಗಳು.