ಮಳೆ ಸುರಿಯುವಾಗ ಬಿಸಿ ಬಿಸಿ ಸೂಪ್ ಕುಡಿದರೆ ಎಷ್ಟು ಚೆಂದ ಅಲ್ಲವೇ? ರುಚಿಯಾದ, ಆರೋಗ್ಯಕರವಾದ, ಸುಲಭವಾಗಿ ಮಾಡುವ ಸೂಪ್ ಮಾಡುವ ರೆಸಿಪಿ ಇಲ್ಲಿದೆ!

ಸ್ವೀಟ್ ಕಾರ್ನ್ ಸೂಪ್ ಮಾಡುವ ವಿಧಾನ:-

1 ಕ್ಯಾರೆಟ್ ತೊಳೆದು ಸಿಪ್ಪೆ ತೆಗೆದು ಸಣ್ಣಗೆ ಹೆಚ್ಚಿಡಿ.

25 ರಿಂದ 30 ಎಳೆಯ ಹುರುಳೀ ಕಾಯಿ ತೊಳೆದು ಸಣ್ಣಗೆ ಹೆಚ್ಚಿಡಿ.

   

100 ಗ್ರಾಂ ನಷ್ಟು ಸ್ವೀಟ್ ಕಾರ್ನ್ ತೊಳೆದು, 1/4 ಭಾಗದಷ್ಟು ಸ್ವಲ್ಪ ನೀರು ಸೇರಿಸಿ ರುಬ್ಬಿಡಿ. 3/4 ಭಾಗ ಬೇಯಲು ಹಾಕಿ.

ಒಂದು ಪಾತ್ರೆಯಲ್ಲಿ ಹೆಚ್ಚಿದ ಹುರುಳೀ ಕಾಯಿ, ಕ್ಯಾರೆಟ್, 3/4 ಭಾಗ ಸ್ವೀಟ್ ಕಾರ್ನ್ ಬೇಯಲು ಇಡಿ. ರುಬ್ಬಿದ ಸ್ವೀಟ್ ಕಾರ್ನ್ ಮಿಶ್ರಣ ಸೇರಿಸಿ 5 ರಿಂದ 6 ನಿಮಿಷ ತಟ್ಟೆ ಮುಚ್ಚಿ ಕಡಿಮೆ ಉರಿಯಲ್ಲಿ ಬೇಯಿಸಿ.

   

ಬಾಣಲೆಯಲ್ಲಿ 1 ಚಮಚ ಬೆಣ್ಣೆ ಹಾಕಿ 1 ಟೇಬಲ್ ಚಮಚ ಕಾರ್ನ್ ಫ್ಲೋರ್ ಹಾಕಿ ಸ್ವಲ್ಪ ಹುರಿದು, ಬೇಯಿಸಿದ ತರಕಾರಿಗಳನ್ನು ಹಾಕಿ ಸ್ವಲ್ಪ ನೀರು ಸೇರಿಸಿ ಉಪ್ಪು, 1/2 ಚಮಚ ಕಪ್ಪು ಮೆಣಸಿನ ಪುಡಿ ಹಾಕಿ ಕಡಿಮೆ ಉರಿಯಲ್ಲಿ ಕುದಿಸಿ ಒಲೆಯಿಂದ ಇಳಿಸಿ.

   

ಕುಡಿಯಲು ಕೊಡುವಾಗ ಸ್ವಲ್ಪ ವಿನೆಗರ್ ಬೇಕಾದರೆ ಸೇರಿಸಿ ಯಾವುದಾದರೂ ಸುಟ್ಟ ಹಪ್ಪಳದ ಜೊತೆ ಕೊಡಿ.

ಮೆಣಸಿನ ಪುಡಿ ನಿಮ್ಮ ರುಚಿಗೆ ತಕ್ಕ ಹಾಗೆ ಹಾಕಿ.

1 ಬಟ್ಟಲು ಸೂಪ್ ಕುಡಿದರೆ ಹೊಟ್ಟೆ ತುಂಬಿ ಹೋಗುತ್ತದೆ! ಡಯಟ್ ಮಾಡುವವರಿಗೆ ಮಕ್ಕಳಿಗೆ ಬಹಳ ಒಳ್ಳೆಯದು!

ಧನ್ಯವಾದಗಳು.