+91 9611100374|admin@indiaforyou.in

ಶರಣು ಶರಣು ಸಂಬುದ್ಧ ಗುರು

//ಶರಣು ಶರಣು ಸಂಬುದ್ಧ ಗುರು

ಶರಣು ಶರಣು ಸಂಬುದ್ಧ ಗುರು

ಶರಣು ಶರಣು ಸಂಬುದ್ಧ ಗುರು ಜ್ಞಾನ-
ದಯಾಸಮುದ್ರನೆ ಬುದ್ಧ ಗುರು|
ಲೋಕನಾಥಸಂಬುದ್ಧ ಗುರು ಆರ್ತ್ತ-
ತ್ರಾಣಪರಾಯಣ ಬುದ್ಧ ಗುರು
ಶರಣು ಶರಣು ಸಂಬುದ್ಧ ಗುರು||

ದೇಶ ಕೋಶಮನೆ ತಂದೆ ಮಡದಿ ಮಗು
ಸಕಲ ಸುಖದ ಸವಿ ಪರಿವಾರ
ಕಹಿಯೊ ಎಂಬವೊಲು ಕೊಡವಿಕೊಂಡು ನಡು-
ರಾತ್ರಿಯೊಳಡವಿಗೆ ನಡೆದೆ ಗುರು||

ಆರುವರುಷದಲೆದಾಟವು ಘೋರ
ಕಡೆಗು ಗೆದ್ದೆ ನೀ ಜಿತಮಾರ
ಬೋಧಿವೃಕ್ಷದಡಿ ಪ್ರಜ್ಞಾಯುಧದಲಿ
ಮಾರಸೇನೆಯನು ಮುರಿದೆ ಗುರು||

ಗೆದ್ದು ಬಂದು ನೀ ವಾರಾಣಸಿಯಲಿ
ಅಮೃತ ದುಂದುಭಿಯ ಬಾರಿಸಿದೆ
ಧರ್ಮಚಕ್ರವನು ಸ್ಥಾಪಿಸತೊಡಗಿದೆ
ಜಗಗಳ ಹಿತ ಸುಖಕಾಗಿ ಗುರು||

ದಯೆಯೆ ಮೂಲವೈ ಸರ್ವಧರ್ಮಕೂ
ಶೀಲವೆ ಜೀವನಕಡಿಪಾಯ
ಶೀಲವಿಲ್ಲದವಗಾಗದು ಪ್ರಜ್ಞೆ
ಜೋಕೆ ಜೋಕೆ ಎಂದೊರೆದೆ ಗುರು||

ಹೊಸದು ಹೇಳಲಿಕೆ ಬಂದವನಲ್ಲ
ಹೊಸದು ಲೋಕದೊಳಗೇನುಂಟು
ಸತ್ಯಪುರಾತನ ಸತ್ಯವೆ ನೂತನ
ಸತ್ಯ ಚಿರಂತನ ಎಂದೆ ಗುರು||

—-ಜಿ.ಪಿ.ರಾಜರತ್ನಂ

By | 2015-04-21T09:57:17+00:00 April 21st, 2015||0 Comments

About the Author:

Leave A Comment